Cadeia humana pola liberdade, coa presença de Antom e Assum

Neste 24 de Julho de 2026, mais um ano, Ceivar convoca a cidadania, na véspera do Dia da Pátria, para fazer que percorra Compostela umha cadeia humana reclamando a liberdade das e dos independentistas encarcerados ou privados de direitos civis por parte de Espanha. A convocatória é às 19:00 desde a Praça da Galiza. <https://ceivar.org/wp-content/uploa...>

Porém, a ediçom deste ano será extraordinariamente especial. Pola primeira vez, Antom Garcia Matos e Asunción Losada Camba, o guerrilheiro e a guerrilheira presos/as pola sua actividade na resistência galega, poderám estar fisicamente com nós durante o acto. Com já 7 anos de cadeia integramente cumpridos, Antom e Assum começárom há pouco a desfrutar de breves permisos fora da prisom, e, nesta ocasiom, aproveitarám a coincidência do permiso coa celebraçom do Dia da Pátria para estarém com todos e todas nós polas ruas de Compostela.

Dada esta circunstáncia, de Ceivar fazemos um chamamento especial para assistir ao acto e poder manifestar directamente ao preso e à presa a nossa solidariedade e o nosso carinho. Mas fazemo-lo para dar apoio e reconhecimento a quem dedicárom o melhor das suas vidas à luita pola Galiza, e continuam a fazê-lo na prisom: nom para celebrar umha liberdade que aínda fica longe. Por desgraça, aínda nom se trata dum recebimento a Assum e Antom pola sua saída da prisom, mas dum forte abraço irmandinho para quem terám que voltar à cadeia; porque queremos que no seu regresso aos calabouços espanhóis, levem consigo o calor e a solidariedade do seu povo.

De facto, temos que aproveitar este facto para denunciar um grande paradoxo: ao pé da nossa alegria por poder compartir esta Cadeia Humana pola Liberdade com Antom e Assum, manifestamos a indignaçom que nos produze nom poder comparti-la com Eduardo Vigo e Roberto Fialhega, os dous ex-presos independentistas a quem a Audiência Nacional mantém baixo “liberdade vigilada” com umha restricçom fascista dos seus direitos civis e políticos que os ameaça com cárcere por assistir a actos perfeitamente legais como o que Ceivar celebra no 24. Na véspera deste Dia da Pátria, também nos manifestaremos exigindo a sua completa liberdade, e recordando a condiçom profundamente autoritária e repressiva desse Estado Espanhol que nega a nossa condiçom de povo e os nossos direitos civis, mas cuja infame bandeira cada vez está mais presente nas nossas ruas (alentada nas últimas semanas, mesmo, por alguns que se dizem nacionalistas galegos).

Liberdade independentistas! Viva Galiza Ceive!